校園Guide

踏入5月，Final Year嘅同學開始變得Panic。雖然考完Final可以輕鬆晒去Grad Trip好開心，但係又擔心如果依家唔開始搵Grad Job無Offer揸手，去旅行都玩得唔盡興，之後一直都搵唔到工又唔知點算好。不過其實每個人嘅路都唔同，有啲人中意希望入大公司，有啲人希望做住PT慢慢搵興趣，所以又唔需要咁快Panic嘅。擔心自己搵唔到Grad Job嘅話，不妨睇下呢篇文，等你知道係待業時間應該點樣過得充實、裝備自己啦。

 

做好時間管理

雖然讀咗書咁多年，難得唔使返學都會想hea下做廢青，但係萬一個人怠慢咗要再重新reboot個腦都幾困難。小編建議大家待業嘅時候都要安排一個合適嘅日程表，計設一套合乎實際需要且能力所及嘅時間表，例如幾時學樂器、幾時見工、幾時有娛樂。不過記得間中都要容許自己放空，預留時間比自己乜都唔洗做，目的係比大腦休息，同思考自己。

 

增值自己

其實增值自己有好多方法，唔一定要洗錢，例如睇Youtube又得，聽下Podcast又得，汲收一下外界嘅文化，擴闊一下視野都唔錯架。想真係提升自己搵工嘅技能，不如試下學好英文或者外語，訓練聽說讀寫嘅能力，提升溝通能力。再有多啲時間亦可以參加吓workshop／讀一啲online course學新技能，又可以整靚仔份CV。

 

鍛練身體

雖然而家仲係好後生，但係身體係跟你一世的，所以要好好照顧自己，為將來忙碌嘅工作生活打定個底。如果budget許可嘅話不妨考慮join下gym，或者去使用康文署gym room／其他運動設施，養成一個運動習慣。因為當你有full time嘅時候需要長期9－6返工可能身體未必適應到，所以及早準備都係一個唔錯嘅選擇。

 

學習儲蓄

待業嘅時候最重要係學識管理好自己嘅積蓄，因為始終唔知幾時先會有full time offer，所以預早作出一定嘅撥備都好需要。例如可以將一個月10%嘅part-time收入留做儲蓄，呢段時間都唔好太大洗，謹慎用錢。另外亦可以download啲有趣嘅理財app，掌握自己嘅消費習慣，再檢討吓邊方面可以慳錢