【大學生活迷思二】住Hall生活

Twing | 18/09/2019
【大學生活迷思二】住Hall生活

九月有好多新鮮人踏入大學呢個新環境,喺呢個花花世界,或者會玩物喪志,或者會迷惘。小編以過來人身份分享大學生活嘅迷思,絕對主觀,只供參考。

住Hall係「大學五件事」其中一件事,亦被受爭議,今次就講吓住Hall。


Hall文化?

間間U嘅Hall都有唔同文化,有d Hall文化可以好濃厚,sell warm、sell chur、做運動、夜蒲、摺、讀書Hall都有,無文化嘅都有。揀住咩hall之前真係要做足資料搜集,年年都有唔少打手喺討論區出post,都唔係唔可以參考嘅,不過計我話,自己嘅感覺係最真實,自己行Reg Day感受吓Hall啲人,再上IG睇吓個Hall過往有咩活動,再判斷邊個Hall適合自己或者住唔住Hall啦。小編之前住嘅Hall都無乜特別文化。
唔埋堆就會比人Bully?眾所周知,某d Hall傳出過Bully人嘅新聞,的確有d Hall風氣係嘛嘛地,有人嘅地方,是非都走唔甩,的確煩。埋堆,或者話識人都幾緊要嘅,不過都唔代表係必須,唔係做到世界仔、交際花就叫好。唔需要逼自己一定要同邊啲人玩,忠於自己,最緊要開心同搵到屬於自己嘅圈子。有好多人包括小編都係同自己本身嘅朋友、中同玩,都一樣開心。
 

Roommate? Toiletmate? Floormate? HallOmate?

呢班人都幾影響你嘅Hall life。遇到一個點嘅Roommate真係好睇彩數,遇到一個投契嘅,絕對可以為你嘅Hall life錦上添花。Roommate係同你一齊生活嘅人,會見盡你嘅真面目,基本上生活大大小小嘅習慣都好難掩飾。生活習慣夾到真係好難架,光係夜訓定早訓已經好大影響,作為夜鬼嘅小編就遇過早訓嘅Roommate。夾就唔夾啦,不過都係講互相遷就同溝通,夜訓早訓都要互相尊重,帶人上Hall要單聲啊。
Toiletmate都好緊要架,同隔離房share廁所,就關乎到衛生問題,小編好彩無遇到污糟邋遢嘅Toiletmate,不過啲私人物品擺咗喺公家地方都要小心。
住同一層通常都有個Whatsapp group,以便大家約食飯或者出黎玩,friend可以熟到大家晚晚夜夜笙歌、放假都想返Hall,唔friend可以生疏到只係Hi-bye friend嘅關係。
有玩Hall Ocamp嘅人,相信呢班Ocamp識到嘅人都會陪你過大部份Hall嘅時間,一定有伴食飯同玩先。
 

日夜顛倒?

正所謂Sleep is for the weak,年青人訓咩覺!小編遇過大多數住Hall嘅人都無三、四點唔會訓,玩到朝早先訓都好常見。有咩做呢?通常離不開打牌、睇戲、打機、打邊爐、煮飯仔,直落飲酒然後飲埋早茶,朝早訓覺,上陣堂或者走堂,夜晚再黎過,節目豐富啊!年輕嘅本錢就係時間多,呢段日子真係好青春,日夜顛倒的確係大學生寫照。當然早訓嘅人都可以喺Hall生存,睇你點同Roommate夾啦。
 

男女關係複雜?

應該係好多人concern嘅問題,究竟住Hall嘅人係咪真係咁隨便?住Hall嘅女仔=臭雞?女小編喺某大討論區見過網民咁講。大學係社會嘅縮影,基本上咩人都有,曳嘅人又有,清泉都有。Hall入面,男男女女喺同一間房裡面,彼此之間嘅隔膜會少咗,可以好近距離相處,好易超越咗個界線,好睇你嘅份人底線喺邊。同一班人日見夜見,或者生活喺個環境裡面,好易被影響,好易被同化,同咩人玩好影響到你有一個點嘅Hall life。
 

住Hall係有好多大大小小誘惑,希望大家都會忠於自己,唔好咁易被影響。不過聽人講,呢啲都只係人地嘅經驗,自己體驗會感受更多,enjoy。


延伸閱讀:

【大學生活迷思一】讀大學的意義

解釋上莊全術語 — Con Day咩意思?

最不堪回首!召喚聚生DSE回憶

【大學生活迷思三】上莊教曉我的事

    大專生很多時候急需資金周轉交學費,但政府學資處的貸款計劃又未能及時批核。因此,uFinance 根據過往同學們的良好還款紀錄,不斷簡化申請程序,申請只需「學生證+身份證」,申請成功率高達95%,全程網上快捷辦妥,貼合同學需要。

  • 滿足不同經濟需要:交學費、交Hall Fee、還卡數、買電腦、學車、創業
  • 任何本地大專院校學生均可申請
  • 申請只需2份文件(學生證+身份證),毋需收入證明
  • 月平息一律低至 0.84%*
  • 最快即日批核
  • 全程網上申請貸款及確認過數
  • 隨時提早還款,0手續費0罰息

Load more