搵工Guide

近年成日聽到好多人講想做「Slasher」，究竟「Slasher」係唔係即係「Freelancer」？啱啱grad嘅話應該做「Slasher」自由啲chill下，定係正正經經打返工儲錢之後先玩下好呢？不如參考下呢篇文再考慮一下畢咗業應該點部署啦！

咩係Slasher（斜槓青年）？

Slasher「斜槓青年」意思指選擇以多重職業或身份生活嘅人，佢哋自介嘅時候都會以斜槓（／，Slash）嚟區分，好似「姓名+ 職業／職業／職業」，所以Slasher或斜槓就成咗多種職業嘅人嘅代名詞。

現今世代，有唔少人都唔甘心只係打一份工，或者得一個收入來源，所以越來越多人會考慮做一個Slasher，發掘一下唔同興趣，睇下有無方法殺出一條新血路。

Slasher=Freelancer？

好多人成日覺得Slasher=Freelancer，即係要有啲技能先可以做到，其實又唔一定嘅。Freelancer（自由工作者）如果之後得一份收入來源，或者只有一個身份，咁佢哋就唔係Slasher啦。不過依家有好多人都會係正職以外接下唔同job，例如教下琴、整下手作上網賣，咁就係freelancer+正職，就會算係slasher啦！不過其實如果你唔做Freelancer，打幾份parttime，或者完全冇正職，全部job都係自由身自己接嘅話，你都係slasher嚟（不用分那麼細啦）。

點解要做Slasher？

如果你個人怕悶，想嘗試唔同嘢，或者想係穩定收入情況下發展自己嘅興趣，做slasher就會帶畀你以上嘅優點。以運動員為例子，好多專業運動員都會去教下波去搵下外快，因為圍返時薪高同埋都係自己熟悉嘅範圍，但係教波又未必有機會比你由朝教到晚，唔想淨返嘅時間無嘢做又想搵多啲錢嘅話，可能就需要搵返份pt support下。或者另一個例子就以開IG shop賣手作精品為例，如果你有一門手藝想買下手作嘢，但又冇乜信心全職做維持生計嘅話，做slasher就會係一個唔錯嘅選擇，至少減低咗經濟負擔就可以少啲壓力擴展自己嘅興趣啦。

我啱唔啱做Slasher？

雖然做slasher好似好多好處，但其實都要講求性格先啱做架。如果你唔係一個好有自制能力嘅人，或者time management唔係特別好，做slasher嘅話你可能未必好好分配到時間，或者冇乜動力R job，咁樣嘅話變相可能收入來源無咁穩定或者比起專注打一份工搵少啲。另外，如果你個人係比較容易「內耗」或者中意穩定嘅人，都未必適合做slasher，不如正正經經搵份FT 然後將賺返嚟嘅錢去做自己鍾意嘅事啦！