校園Guide

去到 4 月，大專生嘅狀態通常得兩種：一係日日摺Lib想死，一係望住電腦個 Mon 乜都做唔到。當你發現自己開始「報復式玩電話」、明明好趕但又乜都唔想郁嘅話，恭喜你，你已經進入咗 「Sem 尾壓力爆煲期」。小編明白嗰種被 Deadline 追殺到抖唔到氣嘅感覺。唔好等爆血管先嚟面對，試下呢 5 招防止壓力爆煲大法，幫你提升作戰狀態！

–

1. 「5 分鐘起步法」

好多時壓力係嚟自「懶惰」。你諗住要寫 3000 字 Essay，個腦就自動覺得要用 10 小時，所以就會慢慢磨一直唔開始。

• 解決方法： 話俾自己聽「我淨係得 5 分鐘」。通常只要你開咗個 Word，打咗頭兩行，嗰種壓逼感就會逼你開turbo。

–

2. 斷絕「社交媒體毒藥」

見到Threads好多人開始曬Intern/Full time Offer好Panic？見到 IG 啲人去緊旅行？呢啲全部係 Sem 尾嘅情緒毒藥。

• 解決方法： 呢兩星期暫時 Delete 個 App 或者用 Focus Mode。你唔需要知道人哋幾優秀，你只需要同尋日嘅自己比。

–

3. 「垃圾時間」斷捨離

如果你發現自己坐喺電腦前 3 個鐘都係打得 50 個字，即刻起身走人！ 去洗個頭、落去 7-Eleven 買支凍飲、或者去跑 15 分鐘步。勉強坐喺度只會令焦慮加劇，腦充血先可以幫你有靈感有動力開始。

–

4. 建立「成就感清單」（To-do List 嘅變奏）

唔好只係寫「做完份 Project」，咁樣太遠。試下寫：

－「搵到 3 個 Reference」

－「打好個 Introduction」

－「整好第 5 頁 PowerPoint」

每剔走一樣，都要同自己講聲「做得好」。細小嘅成就感先係支撐你通宵嘅動力。

–

5. 搵個「求生戰友」互相監督

一個人溫書好易變咗睇 YouTube。搵個一齊趕 Deadline 嘅 Buddy，大家開住個 Zoom 或者去 Library 坐對面，規定「呢 1 個鐘大家唔准出聲」，呢種「監獄式」嘅陪伴意外地有效。

GPA 固然重要，但你嘅精神健康更重要。如果真係頂唔順，記住搵學校嘅 Counseling 或者同朋友傾下。Sem 尾只係得返唔夠一個月，但你個人生仲有好長。加油，我哋一齊捱過佢！