校園Guide

星座其實唔係100%完全代表一個人嘅個性，大家最常討論嘅太陽星座，都只係佔我地性格中嘅一小部分，再加上月亮、上升星座等星盤，咁先算係一個完整嘅星座分析。因為每個人嘅星盤、星座比例組成都唔相同，所以唔會淨係得12種性格。今日就等小編講解多啲太陽、月亮、上升星座嘅分別啦！

 

咩係太陽星座？

太陽星座係星座學入面最常提及嘅，亦係我哋每個人通常講「自己嘅星座」。只要知道一個人嘅出生日期，就可以查出佢所屬嘅太陽星座。而從星座學嘅角度嚟講，太陽星座係代表人嘅天生個性、意志力、同埋自我表達的方式。通過太陽星座，我哋可以對一個人有基本嘅認識，但係要真正完整了解一個人，除咗星座之外，仲要睇太陽所落的宮位同埋同其他星體的角度，所以就算太陽星座一樣，性格都可以有好大差異。

 

咩係月亮星座？

根據星座學所講，月亮星座係指出世時候月亮所在嘅位置，代表住人類情緒、內心安全感、潛意識、精神層面、直覺同氣質等等。由於月亮象徵母親，所以通過月亮星座可知自己對母親的態度，同埋母親給予嘅影響力，亦都可睇出對其他女性嘅態度，對男性而言可顯示出對待伴侶嘅方式。月亮星座通常係幼年表現得最明顯，因為佢會影響潛意識，雖然唔會影響外在的性格表現，但係會影響人格嘅形成。

 

咩係上升星座？

何謂「上升星座」，就係指出世嘅時間由出生地延伸到東方地平線，再向外延伸到黃道上所指嘅星座。所以想知道自己嘅上升星座，就要知道自己詳細出世日期，再計算出當時經緯度。通常上升星座都會反映出一個人嘅個性、外貌同體型嘅真正自我。同傳統嘅生辰八字相似，上升星座係個人星宮圖第一宮的開始，影響人嘅命運變化。唔同嘅星宿坐落喺命宮之中，而每一個星宿位置都影響咗人嘅運程。如果出現在你的本命宮中的星宿不同，人生就會有唔同嘅含義。

 

概括：

太陽=自我意識，理想中嘅自己。
月亮=潛意識，內心處、私下嘅樣子。
上升=外在，外在特質、大家對你第一眼的感覺。