校園Guide

離開學仲有差唔多個幾月，Ocamp可以話係大專/大學入面，其中一個幾重要嘅活動，而且隔咗咁多年冇得實體Ocamp，究竟Ocamp仲值唔值得去？同有冇咩Ocamp秘聞呢？我哋一齊嚟睇睇！

 

小編覺得去Ocamp有三大原因！

1. 不枉青春過

人生入面好難得先有機會可以同一班差唔多年經嘅人對足幾日，搏盡咁為條Team做鳩嘢玩遊戲，夜晚打開個心Deeptalk。呢啲咁嘅日子，大學畢業之後真係唔係話有就有，你Ocamp唔體驗吓，唔通出嚟做嘢先搵班人同你通宵玩Black Magic 咩？當然有啲同學仔唔鐘意玩埋哂啲低能Game，咁都有其他原因其實好值得你玩Ocamp～

 

2. 提早搵Groupmate

自問自己係個毒毒社恐，其實Ocamp係一個大門為你踏出第一步去嘗試團體合作。喺中學果陣時，其實冇咩機會會比你同同學仔一齊合作去做一件事，Ocamp嘅其中一個目的就係幫助你熟習同團隊合作。畢竟大學學習嘅環境唔同，好多時候你都要識得同人合作去做Group Project，而Ocamp現實啲去睇可以比你早一步去認識到你身邊嘅同學仔。你可以透過Ocamp階段就Mark實一啲你覺得可以成為組員一齊學習嘅同學，就可以早過其他同學喺開學前搵到照應同建立你自己嘅「班底」。

 

3. 組爸組媽有時好有用

組爸組媽係你喺學校入面嘅前輩，作自然會比你更熟習同了解課程嘅運作，更有可能地會比到好多有用嘅Source 同貼士你去應付你讀緊嘅科目。Reg科前又可以問吓佢哋嘅意見，提早避伏同埋摸熟啲Profeccor 嘅脾性，自然令你讀得更得心應手啦！

 

應該點揀Ocamp？

除咗自己大中細O之外，其實仲有大大小小嘅Ocamp你可以報，但以小編經驗嚟講，多數大學入面將來見得最多嘅同學都會係系Ocamp識到，畢竟大家讀嘅科相近，分分鐘見足4年架！同埋Ocamp唔一定個個都玩得好癲，而且每個Soc 嘅作風都唔同，大家都可以各自爬文了解更多！

 

Ocamp有咩秘聞？

結集網上同小編親身經歷，其實Ocamp話長唔長、話短唔短都有啲得意嘢發生可以分享比大家～

 

Your Face Your Fate？

咁衰啲講～有時組爸媽揀組仔女時都以外貌先行，小編聽聞過其中一個Ocamp啲組仔囡唔係平均分配，而係靠Bid啲組仔囡返嚟，而且因為擔心特別靚仔或者靚囡嘅新人會被標籤，所以會平均分配，費事成組人都太型太靚。不過有時太靚嘅新人未必是好嘅組員，如果佢哋有「偶包」，會好多遊戲都唔想玩，例如玩水時會因為驚整花自己嘅妝，搞到啲組員要頂埋佢個份。

 

獸父是咪真？

講到Ocamp好多人都擔心有獸父出沒，雖然獸父唔代表一定會摸手摸腳，但對男女有別就一定在所難免。小編聽過唔少組爸send msg比啲組囡同組仔係兩段template，例如對組仔說：「明天記得帶嘢，早點瞓，聽日見，拜拜。」對組囡則是另一個比較親切嘅版本：「今日辛苦晒啦，唔知你今日開唔開心呀？有心事可以同我講返喎！」不過都只係個別事件，所以唔好標籤所有組爸都係獸父啦。其實做組爸組媽都係義務工作，大家都要appreciate返佢哋出錢又出力啦。

 

其實ocamp都算係大學不可或缺嘅體驗之一，無論同學仔你最後玩唔玩都好～都要記得好好享受校園生活啊！