校園Guide

成日都聽到「上莊」呢個字，究竟上莊係咪真係咁正咁好玩？如果有得揀，你會揀上莊定Exchange？Why not both？上集先同大家拆解下「上莊」呢件事！

---

上莊

開學無耐，初黎報到嘅大學校園Freshman都應該對「上莊」非常有興趣，但究竟你地係咪真係知道咩係上莊先？

「莊」即係校內組織包括學生會和學會的內閣，而「上莊」就係擔任呢啲校內組織嘅內閣幹事，同屆幹事之間就會叫做莊員。職責除左學會日常行政事務外，仲有包括Ocamp、學會活動、宣傳等。「莊」種類千變萬化，種類繁多。有俗稱「中央莊」個學生會、學生部、校園電台，亦有各學系嘅系會、興趣學會、大學宿舍、書院嘅莊。任期方面，有長有短，短則幾個月，長則達一年，例如負責籌辦OCAMP嘅便屬於「短莊」，其餘莊就屬於正常莊。

好處

1. 培訓工作技能

「上莊」可以讓你好好裝備自身，投身職場前鍛煉出各式各樣嘅工作能力。例如成為「莊」嘅設計宣傳品成員，例如設計海報、記念品及社交平台嘅貼文等，對日後工作都有野寫落CV。如果係做文書嘅，成年入面會處理大量會議紀錄、電郵查詢，相信一定會提升同學嘅打字速度，處理商業電郵簡直係easy job啦！

2. 擴闊社交圈子

除左實用嘅工作技能，最重要當然係擴闊視野啦，識多啲新朋友。由於每枝莊嘅成員人數都唔少，黎自唔同學系、書院等。好多人都係喺上莊嘅期間搵到另一半，更加多嘅係同莊員做左好朋友。

壞處

1. 犧牲睡眠時間

好多人都話「大學生可以訓8個鐘係XX」，呢句真係講得非常之岩，「上莊」加上學業壓力、兼職，好多大學生每日只可以訓到4-5個鐘，有時仲要為莊搞大型活動，成個星期加埋嘅睡眠時間有機會都唔超過24小時。

2. 犧牲學習時間

唔少過來人都分享因為「上莊」所以唔夠時間讀書，搞到成績未如理想。雖然「上莊」係一個不可或缺嘅大學經歷，但係讀書嘅壓力加埋要花時間喺支莊上面，好多時候都無咩時間、心機溫書，忙上黎可能會選擇走堂，最終可能會影響未來嘅工作前景。