搵工Guide

依家個市咁差，freshgrad BB好不容易搵到full-time諗住可以平步青雲，點知返咗一排工發現份工太伏，好想辭職點算好？不如等小編同你哋分析究竟辭職好定係睇定啲先，同埋如果真係想劈炮唔撈應該有啲咩注意事項？

 

辭唔辭職好？

覺得份工太伏，主要都係兩種原因，一係同事問題，一係工作性質問題。老老實實，要搵好嘅同事真係可遇不可求，喺現今社會周街都係kam L，搵個正常人都難嘅情況下，同事如果做到嘢只係態度差少少，都可以諗會唔會可以留多陣。但係如果同事係工作能力有問題，例如上司乜都卸膊唔教，問同事嘢又十問九唔應，甚至已經假定你00後整頓職場乜都唔識，真係留多陣想死嘅話，咁不如試吓砍掉重練搵另一份工啦。

如果同事正正常常，但係覺得工作性質有問題，咁就有得再deal下。覺得job duty同埋當初job ad有落差，其實都係常見嘅事，因為HR好鍾意寫”ad hoc task”呢三個字，即係代表上司想俾你做乜就做乜。如果覺得工作同想像中好唔同，甚至係能力範圍做唔到嘅，試吓喺試用期嗰陣同上司講吓，睇吓會唔會有training或者工作範圍調整，話晒試用期大家都係互相觀察嘅階段，萬一真係覺得份工唔啱自己都仲可以即刻辭職，唔使一個月通知。所以freshgrad BB記住有啲咩唔對路，首先同上司傾吓先，唔好一言不合就劈炮，因為好工難求。

不過如果發現同上司傾完都係唔夾，咁就開始試吓搵其他工作。有咗第一份工嘅工作經驗，大概會知道自己想做啲咩或者能力做啲咩，自然就會易啲搵到，而且騎牛搵馬點都係壓力細啲嘅。

 

辭職有咩要注意

當大家真係頂唔順決定要辭職，記得要hand over得好好睇睇同埋一定要有交帶，唔好覺得自己做咗一陣，冇乜必要好好交帶，因為難保你將來江湖上會遇見個班同事。另外因為工作時間太短，一般都唔建議大家寫落CV，但係如果大家真係覺得嗰個工作經驗有用嘅，可能輕輕問一問上司，之後嘅reference check可唔可以落佢。當然啦，記得係keep好關係嘅時候先問，費時佢轉個頭同人哋數你就唔好。

最重要嘅係記得唔好blame自己做得唔好、唔夠能力，或者好蠢中伏，及時止蝕都係一個好運嘅先兆嚟，有啲乜嘢唔妥即刻三思而行，咁就唔會浪費過多時間！