校園Guide

「就Grad啦喎，唔係A住Grad咁陰公呀？是但搵條女先啦。」現年22歲嘅陳仔最近成日聽到朋友咁同佢講，既心酸又唏噓。搵到佢一早搵咗啦，駛鬼佢哋講。大學出唔到pool，返咗工梗加唔駛搵，自己啲同事睇怕都係仔嚟，無了無了。「過咗去啦，我返唔到轉頭，唔通而家臨急臨忙搵件豬扒咩。」陳仔只好咁覆佢朋友。

終於到影畢業相嗰日，其他人成雙成對，得閒又咀幾啖，左一句「BB」，右一句「好愛你」，自己就淒淒慘慘戚戚咁抱住隻畢業公仔——老竇老母送嘅畢業公仔。唔緊要，好彩有班朋友啫，佢哋WhatsApp話就到嘅。
Eric Ho：「到晒到晒，喺後花園，速嚟！」
陳仔：「OK」
陳仔着住畢業袍，開開心心咁行去大學後花園。離遠已經見到一大班花生友喺晒到，陳仔幾乎要跪地多謝班親朋戚友。但望幾望，唔對路喎，隔離碌柱綁住條紅底黃字banner，兩行字大大隻寫住︰「熱鬧祝賀陳XX A0畢業，保得處男身！」。
陳仔忍唔住「嘩」咗聲，心諗：「唔鬼係咁大整蠱呀，畢業搞啲咁嘅嘢」。說時遲那時快，班友仔眼尖喵到陳仔，不壞好意咁衝埋去圍住佢，以OCamp Dem Beat咁高嘅分貝一齊大嗌：「A0陳仔，A0 Grad！一日A0，一世A0！」陳仔唔駛望都知隔離左右實恥笑緊佢。

佢哋嗌完仲七嘴八舌，扮晒記者咁「採訪」：「喂，A0 Grad咩感想先？」「我哋真係整咗條banner，有冇好感動？」感動你條命，唔係想我同佢合照呀？
「單獨同佢影幅先啦，」喺唔知邊條茂利慫恿之下，十幾條友越圍越近，陳仔慢慢逼到要烏低身，佢哋繼續逼迫陳仔：「A0！影相！A0……」
.
.
.
「我X？！」陳仔一腳踢開張被，嚇到標晒冷汗，望住黑晒嘅房，佢下意識地郁一郁隻左手，好彩女朋友仲喺到，好彩畢業禮仲有一排。雖然A0 Grad係慘啲，雖然大家都就Grad想搵伴，將就下唔難搵啫，都唔駛講到唔搵好折墜會一世A0呀。呢個社會係咩事，A0 Grad就畀人笑，年紀再大啲就畀人話剩男，被逼婚。
.
.
.
為拍拖而拍拖，為結婚而結婚，
咁將就嘅人生，唔要都罷。
不如畀大家多啲時間，慢慢揀個大家真係鍾意，真係想一直一齊嘅人，好嗎？