校園Guide

對好多 Freshmen BB 嚟講，Ocamp係大專生涯最夢寐以求嘅第一站！你可能喺呢幾日入面，認識到未來 4 年一齊走堂、一齊趕 Deadline 嘅「生死之交」，但對於唔少過來人嚟講，Ocamp 似乎又唔係「Must Go」。

究竟Ocamp值唔值花幾百蚊同幾日時間去玩？入面有咩組爸組媽唔會公開講嘅秘聞？小編今日幫大家一次過拆解！

 

小編覺得去Ocamp有四大原因！

1. 不枉青春過

人生入面真係好難得有機會，可以同幾十個差唔多年紀嘅人對足幾日幾夜，搏盡無悔咁為條 Team 玩一啲好「無聊」但超爽嘅 Game，夜晚再通宵Deeptalk。呢啲日子，等你畢業出嚟做社畜之後真係「搵唔返」。你 Ocamp 唔體驗下，唔通出嚟返工先搵同事同你通宵玩 Black Magic 咩？

 

2. 提早搵Groupmate

自問係個「社恐/毒毒」，其實 Ocamp 先係你踏出第一步嘅最佳溫室。大學學習環境同中學完全唔同，九成科目都要做 Group Project。去 Ocamp 嘅現實好處，就係畀你提早 Mark 實身邊啲「醒目仔/女」。開學前建立好自己嘅「固定班底」，總好過開學嗰陣同啲不相識嘅Kam L分喺同一組！

 

3. 組爸組媽= 4 年大專生活嘅「攻略本」

組爸組媽作為你嘅老鬼前輩，對課程運作、邊個 Professor 爛 Grade、邊個 Tutor 人好，絕對瞭如指掌。Reg 科前有佢哋畀貼士，簡直係提早避伏嘅最強護身符。最重要嘅係，有啲好組爸組媽仲會「傳承」舊Past Paper 同 Assignment 嘅神級 Source 畀你！

 

4. 解鎖「大專限定」周邊

唔少大SOC或者系 SOC 嘅Camp Tee同其他Soc items都設計得好有心，仲有好多贊助商嘅Products試用。呢啲嘢唔參加 Ocamp 通常係攞唔到嘅，有時著住件Tee上堂，喺 Campus 一眼就認得返同屆嘅同學！

 

應該點揀Ocamp？

大學入面嘅 Ocamp 大致分為四種：大 O（學生會）、中 O（學院）、細 O（學系/科系）同埋 Hall O（宿舍）。

– 最值得去：細 O (系 O) 見得最多嘅一定係你同科嘅同學，畢竟讀嘅嘢一樣，分分鐘一齊上堂見足 4 年！

– 最需要心理準備：Hall O 宿舍 Ocamp 傳統上會玩得比較 Chur、時間極長，適合性格極度外向同鍾意夜生活嘅同學。

每個 Soc 嘅風氣都唔同，O-day前可以去 Threads或者連登爬文睇下舊生嘅評價，揀返適合自己性格嘅 Ocamp 就唔怕尷尬！

 

Ocamp 3 大隱藏秘聞拆解！

Your Face Your Fate？

衰啲講句～有時組爸組媽揀組仔女，真係會「以外貌先行」。小編聽過唔少 Ocamp 嘅組仔女唔係隨機分配，而係喺 O-day 之後，組爸組媽開會 「Bid (競投)」 啲新血返組！ 不過放心，大家通常會協議「平均分配」靚仔靚女，防止某組太型太靚。而且太靚嘅新人有時反而有「偶包」，玩水或者泥沙遊戲嗰陣因為驚花妝而唔想玩，最後要其他組員替佢頂，未必係最受歡迎嘅組員！

 

獸父是咪真？

講到Ocamp好多人都擔心有獸父出沒，雖然獸父唔代表一定會摸手摸腳，但對男女有別就一定在所難免。小編聽過唔少組爸send msg比啲組囡同組仔係兩段template，例如對組仔說：「明天記得帶嘢，早點瞓，聽日見，拜拜。」對組囡則是另一個比較親切嘅版本：「今日辛苦晒啦，唔知你今日開唔開心呀？有心事可以同我講返喎！」不過都只係個別事件，所以唔好標籤所有組爸都係獸父啦。其實做組爸組媽都係義務工作，大家都要appreciate返佢哋出錢又出力啦。

 

「Deeptalk」嘅真相：有人搵真愛，有人搵水魚？

Ocamp 嘅重頭戲通常係夜晚Deeptalk環節。大家圍坐喺度講下心事、感情史同對大學嘅期待。呢個環節確實好容易拉近距離，甚至誕生「Ocamp 戀情」；但亦要留心，有小部分「不良老鬼」會利用呢個機會打聽新人嘅家庭背景、感情狀態，甚至開學後 Sell 保險或者做 Pretend Friend。

 

其實ocamp都算係大學不可或缺嘅體驗之一，無論同學仔你最後玩唔玩都好～都要記得好好享受校園生活啊！