校園Guide

今年fmbb慘喇！由於疫情肆虐，好多ocamp唔係取消就轉晒做「ocam」，但啲搞手都頭痕——campfire又跳唔到、beat又dem唔到——究竟網上ocamp可以玩啲咩呢？小編都思考咗一輪，先揀到5個比較適合網上ocamp玩嘅game，OC不妨參考吓～～

1. 真真假假

   呢個係以分享為主、靜態啲嘅遊戲，比較適合一開始大家都唔太認識嘅時候玩，目的都係等大家互相認識多啲。
   玩法好簡單：首先每人拿出紙筆，喺紙上面寫低3樣關於你自己嘅事，但係其中只有2件事屬實，而有1件係假嘅。然後，輪流逐個講自己手上面嘅三件事，講者要儘量唔俾人發現假嗰件事，而其他人就估吓佢邊件事係真邊件事係假。被人估中的話就可以要接受懲罰。
   例子：同學A先寫低三件事——中學讀理科（假；其實佢讀文科嘅）、好怕黑、未離開過香港。然後組爸媽就可以同其他同學投票估邊件事係假，無論估得中唔中都可以俾機會同學A開估講返關於自己嘅事。
   變化：可以玩5件事，其中3真2假，視乎時間而定；亦可以限定講咩範疇嘅事，例如學校、家庭、愛情等等（可chur可唔chur喇，視乎組爸媽～）

2. 大學八件事

   呢個就比較deep比較需要同學思考嘅遊戲，可能更適合第三、四日「ocam」先玩。
   玩法：首先每人拿紙筆，先把紙分成8格，然後喺背後標上1-8嘅數字，讓大家喺鏡頭睇到。之後主持人（組爸媽）會俾啲時間大家分別喺8格寫上8件入大學好想完成嘅事。接下落嚟，主持人會逐一講出喺大學遇到不同掙扎、不同取捨嘅時刻，每講一件時刻都俾足夠時間同學選擇一格來撕掉（捨棄一樣好想achieve嘅事）；途中可以係主持人決定撕掉某一個數字嘅嗰格。最後大家剩下一格的時候，主持人就可以讓同學思考一下這是否自己入大學的初衷？然後可以逐個分享吓自己入大學想做嘅事同埋取捨嘅感受。
   變化：可以只玩5件事（視乎時間而定）；可以調整捨棄自己選擇的事同捨棄特定一件事的比例。

3. First impression

   講咗兩個比較多分享嘅game，玩返個經典ocamp房game啦。
   玩法：基本上與平時面對面玩嘅無分別，都係男一隊女一隊，各自秘密地為對面隊每個人標一個數字。然後諗人頭數咁多嘅問題應用在自己隊上，然後邊輪流問問題讓對面隊投票選出他們心中對自己隊員first impression嘅答案。最後一齊揭曉大家為對面隊隊員標的數字，並與投票紀錄對讀。
   例子（男隊ABCD同學 vs 女隊EFGH同學）：男隊ABCD同學先秘密地替女隊EFGH同學標上分別為2、4、1、3的數字，女隊亦為ABCD同學分別標上1、4、3、2的數字，然後各隊各諗4條（人頭數）應用落自己隊身上嘅問題，例如「我哋邊個最似痾完屎唔洗手？」、「如果要同我哋是但一個拍拖，你最想/最唔想揀邊個？」。跟住輪流向對方提出問題，當男隊先向女隊發問「我哋邊個似最揀飲擇食？」，女隊則以數字投票選出答案，得出「2票1號、1票3號、1票4號」的投票結果，反之亦然。最後一齊揭曉大家為對面隊隊員標的數字，並與投票紀錄對讀。
   變化：呢個game嘅問題可以好mild問吓日常嘢，亦可以好地獄如「荒島題」等，都係嗰句可chur可唔chur啦～

4. 猜猜畫畫

   呢個遊戲可以借助免費網上平台如Gartic.io，或者齋靠主持人同紙筆玩，都係用來炒熱氣氛，大家嘻嘻哈哈嘅game，ice break玩又得夜話（如果仲有）玩都得。
   玩法：畫題者會收到一個題目（e.g. 蘋果），然後佢要喺唔用數字、文字、符號嘅情況下用畫畫嘅方式表達呢樣東西出來，其他人鬥快估返個題目。估錯、估唔到、最慢先估到或最低分嘅人就要受懲罰。
   變化：選定特定範疇作題目，例如紅色的東西、辦公室裡的東西、政治人物等等。

5. 誰是臥底

   呢款遊戲都係可以借助app等工具玩，或者齋靠主持人用chatbox功能玩，一樣係維持氣氛嘅群體遊戲，ice break玩又得夜話玩都得。
   玩法：有三種角色，「平民」會拿到一個詞語，「臥底」會拿到與平民有關聯但不一樣的詞語，「白痴」則什麼也沒有，只有空白。視乎人數而定「平民」、「臥底」與「白痴」的比例——一般來說8人（5平2臥1白）；10人（7平2臥1白）；12人（8平3臥1白）；14人（9平3臥2白）；16人（10平4臥2白）。開始時，每回合每個玩家靜係可以講一句嘢描述自己收到嘅詞，唔可以講得太明顯，免得俾臥底或者白板估到，而臥底同白板就要盡量隱藏身分，同時估平民嘅詞語。全部玩家發言晒之後就投票投出臥底或白板，獲票過半數嘅玩家就會出局。若果活著嘅平民少過三個，咁就平民輸、臥底贏，遊戲結束；若白板估到詞語並準確咁講出嚟，咁就白板贏，遊戲結束。
   例如：平民收到嘅詞語為「蘋果」、臥底收到嘅詞語為「橙子」、白板收到空白，回合開始就輪流形容呢個詞語，譬如話「2個字嘅」、「可以生食嘅」、「對人體有益嘅」之類之類，講晒之後就投票。
   變化：選定特定範疇作題目，例如家裡的東西、辦公室裡的東西、大學裡的東西等等。

如果你係今年Ocamp OC睇完之後希望俾到你一啲insight同idea點搞「ocam」，帶俾fmbb疫情下一點小確幸～

延伸閱讀：

【光復香港樂壇】廣東歌Cantopop｜唔怕無好歌只怕無人聽

【信用卡優惠】睇戲熱潮 百老匯／UA戲院信用卡優惠

【Apple教育優惠】買Macbook/iPad送AirPods

【戲院終於開返】6套必睇好戲／UA新會員優惠