校園Guide

早前上某哲學page同連登share一張香港文青starter pack同advanced pack，唔知大家中咗幾多？小編覺得幾好笑，吓，原來呢啲喜好都會歸類成文青。香港人係鍾意標籤，質疑其實呢班所謂「文青」係偽文青、跟風，其實真又好假又好，如果扮文青可以成為一個契機，比大家接觸文哲史，何樂而不為？

文青愛懷舊復古，除咗衣著參照九十年代，仲會睇舊時嘅電影，其中王家衛嘅電影走向大異於香港商業電影，引來一班人嘅青睞，包括小編在內。加上鍾意小眾野，開始接觸cult片，今日先淺談王家衛電影吸引力所在，再講cult片。

 

王家衛電影：訴說城市人寂寞 關注個人內在情感

王家衛嘅電影故事大多支離破碎，例如《重慶森林》分開兩個故事。喺一個大環境下，電影角色各自有自己嘅內在情感問題要處理，性格十分鮮明，好有個人色彩。繼續用《重慶森林》做例子，戲名已經用重慶大廈比喻成大都會石屎森林，每天與林林種種嘅人擦身而過，而且英文「Express」可以理解係電影中出現嘅速食攤，亦係比喻都市愛情。

王家衛電影：藝術成份高

後現代風格同鏡頭語言嘅美學係王家衛電影備受稱讚嘅地方。不論構圖、燈光定配樂嘅運用上，都同一般主流電影畫面有好大差異，王家衛電影經常有好多動感、失焦等畫面，帶來視覺、聽覺嘅刺激。以上，攝影杜可風有好大嘅功勞。

 

王家衛電影推介

《東邪西毒》、《春光乍泄》、《墮落天使》

 

 

Cult片

cult為何物？咩電影算係cult？cult片有定義之難，但往往離不開rock、毒品、扮裝、punk、血腥、暴力、政治煽動，劇情教人估唔到。用香港電影做例子解釋吧。

 

《香港製造》（1997）

係文青圖所提及嘅電影，陳果導演嘅首部獨立電影《香港製造》，採用極低成本製作，起用當時未係職業演員嘅李燦琛。電影表現出當時香港社會環境同香港人心態。

 

《人肉叉燒包》（1996）

邱禮濤有香港Cult片之王嘅稱號，電影以轟動整個社會嘅奇案做題材，用上大量血腥恐怖嘅鏡頭，造就呢套電影成為港產Cult片嘅代表作。