校園Guide

如果扮文青可以成為一個契機，比大家接觸文哲史，何樂而不為？

第六集香港文青starter pack，同大家講吓文青最鍾意睇咩文哲史類書，順便介紹以下6本書。

 

【小說】

推介小說嘅話，小編會揀經典嘅小說。世界上出名又經典嘅小說有好多，以下呢兩本小說有容易代入嘅，亦有比較fuck up嘅，作為文青，一定要睇吓。

1）《挪威的森林》／村上春樹

日本名作家村上春樹係好多文青或者年青人都鍾意睇，而《挪威的森林》正係村上嘅代表作。《挪威的森林》可以睇到佢嘅風格同獨特嘅寫作方式，此書以愛情同人性為主軸。要注意嘅係書中有好多自殺情節，以及主角同不同女人周旋。大家略略知道呢本書講咩之後就快啲去睇啦。

 

2）《人間失格》／太宰治

同樣係日本文學，由太宰治所寫嘅《人間失格》，書名嘅意思就係失去做人嘅資格。聽個名都feel到一陣憂鬱、絕望嘅感覺。事實上，呢部小說係太宰治生前最後一部作品，喺1948年發表完之後，太宰治就同佢嘅女書迷殉情而死，所以呢本小說經常被人視為係自傳性質嘅小說。篇幅較《挪威的森林》短，好快就可以睇晒。

 

【散文】

散文同小說唔同，睇咗少少，再隔一排先睇都唔大影響，比較輕鬆。

1）《拼命無恙》／林夕

小編就諗起林夕近十年都出咗唔少新詩同散文，例如《那麼，你自己呢？》、《原來你非不快樂》，細心嘅你就會發現書名係參照佢自己嘅詞。包括上年出嘅《拼命無恙》，同現今時代、動盪社會扣上關係。話比大家知，喺在非常時期，更要保住生活日常。

「想保無邪之軀，還是必須好好過下去」。

 

2）《回家》／韓麗珠

《回家》係韓麗珠第一本散文集，內容關於作者獨居於島嘅生活記述，由空間、物件、親人等多個面向切入，思考「家」。近年愈來愈多人離居，移民他國。離開咗嘅香港仲係咪我嘅家？喺其他國家嘅新居所又係咪我嘅屋企？何處是吾家？

 

【現代詩】

近年愈來愈多現代詩，台灣出產超多，例如 Instagram page「晚安詩」、「Staymild」，過十萬人follow，呢啲 page 專精選各首不同現代詩，然後喺網路上轉載。現代詩輕薄簡短嘅特性，令佢漸漸走入大眾視野。台灣比較出名嘅新人有陳繁齊、任明信、潘柏霖等。

1）《我討厭我自己》／潘柏霖

所以小編喺芸芸現代詩裡面揀咗《我討厭我自己》推介比大家，由潘柏霖所寫。好簡單，就係比討厭自己嘅人睇的。入面嘅詩有長有短，好快就睇得完，輕輕鬆鬆。有苦痛嘅人睇，相信會得到安慰。

 

【哲學類】

1）《大時代的哲學》／好青年荼毒室

近年好hit嘅好青年荼毒室，相信大家都有聽過或者睇過佢地嘅Youtube live，最高峰有過二千人同時收看架。佢地係一班讀哲學嘅人，佢地杜絕文青，但正如小編撰寫呢個系列嘅目的，就係希望大家可以藉扮文青嚟接觸文化層面嘅事物。例如哲學，喺大時代中，哲學思想同態度點樣幫助我地諗野呢？