校園Guide

每個地方都有佢哋主要用嘅餐具，而係亞洲地區，好多國家都豬要用筷子作為主要嘅餐具。但係！你又知唔知唔同國家嘅筷子，佢哋嘅材料同設計都係各有不同，而設計嘅背後都係又原因的！所以今次「珍奇異國」就分別介紹下港日韓筷子嘅分別啦！

 

1.香港🇭🇰

港式筷子係設計上普遍都係上方下圓，同偏長。

 

「上方下圓」嘅設計，圓柱嘅部分占較大嘅比例，可以令夾取食物嘅時後比較慳力，用嘅時候都比較舒服；而筷子長方方型嘅設計就可以令筷子放係檯面嘅時後唔會轆嚟轆去。

 

「上方下圓」嘅設計原來仲有特別意思！中式筷子「上方下圓」嘅設計，代表「天圓地方」；筷子上方型同圓型之間的轉換，就表現咗「剛」與「柔」之間嘅轉換。

 

而筷子設計得比較長係因為香港人經常一家大細圍埋一齊夾餸食飯，變相餸菜距離自己較遠，所以筷子設計得比較，方便夾餸。

 

2.日本🇯🇵

日式筷子普遍都係上寬下細，筷子頭比較尖。另外，比起中式同韓式的筷子，日式係相對較短。點解會咁樣設計呢？

 

首先，筷子頭造得比較尖細係因為日本人嘅食物通常比較小巧精緻，同時佢哋好鍾意食海魚，所以筷子就設計成尖頭，咁就容易撩魚肉或者魚刺。至於長度方面，日本人興定食，每人一個set，唔同我地一大班人圍住夾餸食飯，所以筷子冇必要做到好長。材料方面，日式筷子通常以木或者膠製為多。

 

而且日式筷子嘅長度係江戶時代有分男女，男嘅就23cm，女就21.5cm，聽說係根據當時嘅男女身高同埋手嘅平均尺寸作為基礎而制定。但到做依家，就已經冇特別分男定女用嘅筷子。

 

3.韓國🇰🇷

典型嘅韓式筷子係扁平形狀，由金屬製作，重量比其他國家用嘅筷子較重，所以有人將韓式筷子稱之為「最難用的餐具」，就算其他亞洲人用慣筷子都覺得難以操控。

 

至於點解會用金屬去製作？因為古代韓國皇室嘅筷子係用銀去製作，方便為皇帝嘅膳食驗毒。到咗依家，普遍韓式筷子都係用不鏽鋼製，因為銀實在太貴了。

 

除咗驗毒之外，用金屬製嘅筷子比較容易清洗，唔會吸味，因為韓國食物比較多醬汁，同以湯飯為主，木製會較容易吸味，又難清洗。

 

另外，韓式筷子製作成扁平形狀聽講係為咗節省材料，始終金屬成本都比較高；亦有另外一個講法就係話扁平形狀嘅筷子唔會咁容易係檯面上轆走。