校園Guide

刺激又好玩嘅過山車有好多，刺激指數有高有低，小編就係啲唔激唔玩嘅一類人。今次「珍奇異國」就介紹由美國CNN網站評選出全球最刺激嘅5個過山車，分別有日本、美國、加拿大、瑞典嘅過山車，每個過山車都有特別之處，齋望都嚇死人！小編仲發現自己有玩過其中一款(冇人想知)，有點自豪～快啲睇下你敢唔敢玩，定你係望到都腳軟！

 

1.日本富士急高原樂園 高飛車 🇯🇵

呢嘅過山車大家應該都好熟識，被《健力士世界紀錄大全》認證為世界最大傾斜角度嘅過山車。高飛車全長1004公尺，高度有43公尺，以121角度向下衝，最高時速可以高達100Km/h。

 

2.美國俄亥俄州 Millennium Force 🇺🇸

美國嘅主題公園「Cedar Point」最出名就係刺激遊樂設施。當中過山車「Millennium Force」向下衝嘅時候，會有衝入湖嘅感覺。

3.美國佛羅里達州 Sheikra 🇺🇸

美國佛羅里達州嘅「Busch Gardens Tampa Bay」是一個非洲動物主題公園。園內最有出名就係「Sheikra」。過程中有兩次俯衝，超刺激！

4.瑞典 Wildfire 🇸🇪

「Wildfire」係位於瑞典科爾莫登野生動物園嘅木造過山車。聽聞俯衝嘅過程容易因為失重，有機會從椅子上浮起來，好刺激(恐怖?)。

5.加拿大 Yukon Striker 🇨🇦

位於加拿大安大略省旺市「Canada’s Wonderland」嘅過山車「Yukon Striker」係必玩設施。上到最高點嘅時候會先係空中停3秒，然後友75公尺高向下俯衝！小編就係玩過「Yukon Striker」，玩嘅時候都唔知原來係世界最刺激過山車之一，但好深刻就係空中停留3秒好似3年咁耐，但跌落去就3秒都唔洗～