校園Guide

唔知大家會唔會明明唔係好多野做，但係啲時間又唔知用哂去邊？到你一有好多野做，又好似做極都做唔完咁？要解決哩個問題，方法只有一個，就係成為時間管理大師！今日就等大師。。。唔係。。等小編我過大家兩招，將你嘅問題一一K.O.！

 

1/ 行程表IS A MUST

小編有一個習慣，就係每次一交更或者收到Assignment deadline嘅時候都會嗱嗱聲Mark落本schedule到！因為咁樣你就可以將你要做嘅嘢一目了然，到有人約你嘅時候，你就可以諗下你份功課夠唔夠時間做或者睇下會唔會撞左翻工時間。如果你嫌Schedule book太阻埞，依加有好多手機app 都好方便mark schedule㗎。

 

2/  拒絕拖延

當你Set好個日要做啲咩，你千祈千祈千祈唔好拖到第二日先做！可能你會諗，「哦！個份功課好快做完姐，今日好攰，不如聽日先做啦！」 就係咁，你就跌落左一個無底深淵，惡性復環，點解？因為第二日你又會同自己講翻同一句野，學呀媽話齋，明日復明日，明日何其多呀？唔想日日諗住自己啲功課債，不如快快脆脆搞掂佢！好過去到最後一日先嚟做，結果因為好趕，無哂啲質素咁！

 

3/ 分清做事先後次序

理論相信大家聽唔少啦，先做最重要同最迫切嘅事，但實際你係咪真係跟哩個方法先？以小編所知，大部分人都會因為抗拒困難而複雜嘅Task，所以先做簡單嘅Task。但有時個啲簡單嘅Task又未有咁趕急，所以最後好似唔夠時間做又難又迫切啲Task！嚟，跟小編講一次「先苦後甜」！捱過去就見到終點㗎啦！

 

4/ 搵啱方法做事

唔係喎小編！我又有mark schedule啦，又有set好邊日做野啦，又有分清做事嘅先後次序！點解啲野成日又都好似做唔切咁嘅，係咪我做得太慢啦？其實可能並唔係能力問題，而係因為你未搵啱方法。例如溫書咁，點解有啲人用半個鐘就可以溫完一個Chapter，而你可能要兩至三個鐘先溫完呢？會唔會係因為你上堂個時無咩點drop notes所以要用多啲時間理解啲內容？或者你唔知點先溫得入腦所以要抄好多次先記得呢？以上所講嘅情況都好大機會因為你未掌握到溫書技巧！同一道理，做其他Task個陣都可能搵唔啱方法，所以先做得慢。想事半功倍，記得開始之前搵啱自己嘅方法！