校園Guide

大學畢業季嘅來臨象徵我哋人生最後嘅學生生涯準備完結，喺呢啲咁重要嘅moment，影翻一輯相留念都係一個唔錯嘅選擇嚟。但係原來要影到完美嘅畢業相都有好深學問，今日小編就搜集咗幾個影出獨特畢業照嘅小攻略，快啲bookmark定啦keke～

 

1.衣著好重要

其實畢業袍內嘅穿搭係深有學問ga，男仔最好就著企領的恤衫，例如標準領或對比領，咁樣就能確保條tie順之外仲可以修飾頸部，睇落更加有型。而女仔就可以變化多啲，簡單嘅連身裙／半身裙配合白色恤衫都已經可以好好睇，不過如果想著高爭鞋影相嘅女孩子最好帶多對平底鞋換啦，如果唔係著全日影相都真係幾辛苦嗚嗚。

2.妝容要持久

好多女仔為咗影相效果最好，通常都會盛「妝」打扮一番。但其實太誇張嘅妝容同畢業相其實真係有啲格格不入，其實妝容精神乾淨最重要，想花啲小心機嘅話稍微加深眼妝的顏色其實已經好夠。而髮型方面都唔好太花巧太誇張，實在無頭緒的話，youtube有好多簡易髮型／妝容教程可以做參考喔。ps.記住要好好做定妝啊，如果唔係妝花曬你張畢業相就gg。

3.搵個真係識影相嘅「攝影師」

相信影畢業相嘅時候，好多人都會求助於自己嘅好朋友／伴侶嚟幫自己做攝影師。其實呢個係無問題嘅，不過喺呢個「一生人一次」嘅重要moment，最好就揀定個真係識少少影相技巧嘅朋友仔啦！如果有資金／人脈嘅話，搵個專業攝影師幫手，用最完美角度，捕捉你同屋企人／朋友之間最自然嘅一面咁就最好不過啦～

4.練習定笑容同pose啦

對於好多人包括小編自己，都好似患咗「​​鏡頭尷尬症」咁，一到影相嗰刻就會各種唔自然。唔緊要，呢啲先天缺陷可以靠練習嚟矯正！肌肉其實係有記憶嘅，影相之前大家可以自己喺屋企對住塊鏡練習下，睇下邊種表情最適合自己。咁樣去到鏡頭前，就可以一招到位啦。而影相如果覺得隻手仔好尷尬，唔知擺咩post的話，不妨用啲小道具例如畢業公仔幫幫自己啦xd～

5.地點同時間要夾好

除咗喺校園入面影相，有時間嘅話校園外面都有好多唔同嘅靚景可以比大家影輯靚靚畢業相。唔同嘅海濱公園／復古建築都好值得去ga！約埋同學仔／屋企人一齊去唔同嘅地方留低倩影其實都係一件幾有意義嘅事。不過記得約影相之前要睇定天氣同埋景點開放時間喔，特別而家咁熱嘅時候可以揀朝早／下晝一啲無咁熱同曬嘅時間，盡量避開正午啦～

ps.祝大家都可以影到一輯滿意嘅畢業相啦～