校園Guide

大學畢業作為人生一個重要里程碑，好多人都會選擇送翻份禮物比自己嘅朋友表達祝賀。但畢業禮物嘅選擇咁多，好容易就會中伏買咗啲「雷品」，究竟要送啲咩才能表達心意又實用呢？小編今日就精選咗5款畢業禮物，祝大家同同學仔之間都可以友情長存～

 

1.畢業花束

對於大家嘅畢業禮，影好多好多靚相is a must，而呢個時候一紮靚靚嘅畢業花束就係影相最好嘅道具。無論係乾花、保鮮花、鮮花，市面上都有好多選擇，豐儉由人。而且送唔同嘅花都有唔同嘅祝福意味，仲可以自行定製朋友最鍾意嘅花，都幾有意義ga～

2.相片回憶錄

相信大家同朋友／自己伴侶之間嘅合照都應該有唔少，呢啲全部都象徵住大家嘅關係同埋美好嘅回憶。將呢啲回憶整成禮物都幾代表到大家同朋友之間嘅感情啊keke，就算唔係好識手作嘅朋友仔都唔緊要，而家市面上有好多半製成嘅禮物盒／爆炸盒教程。只需要一啲你哋之間嘅相同埋寫幾段你對朋友嘅祝福說話就可以啦～相信收到嘅朋友都一定會好感動

3.電子設備配件

大學畢業之後大部分都要踏入社會工作了，所以送文具類別嘅禮物好似已經有啲不合時宜，但係電子設備配飾就好實用啦！無論係做嘢又好／同親朋好友聯絡都係，電話同電腦都好重要。所以送一個好嘅配飾例如電話套／airpod case／電腦配件都好朋友都一定用得著，而且仲好貼心添～

4.畢業公仔

無論男仔女仔，相信都總有自己鍾意嘅公仔角色。無論係hello kitty定係高達／超人都好。一隻畢業公仔總係會為你嘅畢業相增色不少。而家啲畢業公仔仲要係全部有埋畢業袍同埋色帶，同自己隻公仔一齊手拎畢業證書都係一件幾有意義嘅事嚟嘅。ps.而家仲有得定製人形畢業公仔，印埋自己／朋友個樣上去一齊畢業，小編比10個趣！

5.訂製腕錶／飾品

我諗對於好多人嚟講，畢業禮物都想要一份特別而又常用嘅。而對於將要踏出社會嘅大家嚟講，守時都係一個好重要嘅品德嚟ga～而家有好多舖頭嘅訂製腕錶連錶面都可以自己設計同訂製，而且非常獨特同埋凸顯個人風格喔！如果朋友無帶手錶嘅習慣，送定製耳環／手鍊等等嘅飾品都唔錯而且實用性非常高呢。