校園Guide

Jupas就放榜啦，好多朋友仔係咪好擔心自己究竟有冇offer？有就當然最好啦，冇就要頭痕啦！好多人都會係兩個選擇之間苦惱，究竟應該去retake再考多次DSE還是係去讀副學士，然後再經non jupas入番大學呢？呢個blog就同大家講下兩個途徑的分別，等大家更容易知道你究竟適合邊個方法啦！

---

重考DSE？

先講一下重考DSE，好多學生都會選擇重考DSE因為覺得讀副學士或者高級文憑我又好多要同其他同學合作的project，隨時影響到你嘅成績。但相反DSE係自己熟悉嘅制度，全憑自己嘅表現，冇太多外在因素影響。但係如果你選擇重考DSE係需要好好規劃，如果唔識好好規劃你嘅溫書大計重考成功嘅機會係會大減低的！

 

以日校學生身分重考

如果你係學校重讀中六之後再考DSE，相信問題唔大，始終返學校會有更多學習氣氛，又有人篤住你溫書，有咩唔明都可以問老師，學校嘅資源亦都較多。但係好多SBA、校內嘅考試、測驗你都要重做，某程度上都浪費咗你一啲時間。

但如果你係揀以自修生嘅身份重考DSE，好處當然就係唔使跟學校嘅進度，唔使考校內嘅考試，可以針對自己嘅弱點而溫書。但係揀得自修嘅話，自律係最重要！因為冇人會篤住你溫書，唔覺意可能就浪費咗一年，成績可能仲差過上次。

 

讀副學士？

再講下副學士或者高級文憑，兩個嘅學習模式都非常相似，只不過副學士比較着重學術基礎而高級文憑比較着重某種技能或者職業。好多人都會問讀副學士再升大學會唔會好難，小編身為一個過來人，可以話俾你聽只要比心機，做好所有論文同project，攞靚grade，絕對可以升到大學！不過揀得副學士，自律一樣好重要，因為冇老師會催你交功課，冇老師會主動幫你，除非你自己主動去搵老師諮詢。而且想升到大學一定要高GPA，所以你唔做一樣死～讀副學士可以提前感受大學嘅讀書模式，之後上大學都容易適應啲。

 

所以究竟揀重考DSE定讀副學士，真係好睇你自己嘅性格。希望呢篇blog可以幫你了解兩個方法分別嘅好壞，等大家都清楚自己應該揀邊條路！不過當然都希望大家Jupas都有Offer啦！