大專生理財101

最近越嚟越多航空公司做Promotion，所以一到Sembreak大家都會即刻離開香港，去返幾個短Trip。不過因為budget所限，如果可以的話都會想將不必要嘅開支Cut走，住Hostel食Lawson咁就ok，甚至會考慮唔買旅遊保險，慳得1蚊得1蚊。不過其實旅遊保險都好重要，因為天災人禍呢啲嘢預計唔到，究竟有啲咩保障到？不如參考下呢篇Blog啦！

 

以下提供幾個旅遊保險普遍覆蓋範圍：

1. 旅行期間大病一場
同學仔去到外國有可能因為唔適應氣候、水土不服、發生意外或者各樣原因，係旅途中患病。如果有買旅遊保險，就唔需要擔心高昂醫療費用。

2. 航班取消或延誤
有時成日聽到身邊同學仔呻話廉航（ＬＣＣ）取消航班唔會事先通知，亦唔會退款。買左廉價機票嘅同學仔有可能得不償失。有買保險嘅同學仔就可以拎返相應嘅損失。不過要注意，有關旅程延誤嘅定義，每間保險公司都有唔同詮釋，同學仔需要留意返延誤幾耐先至可以獲得賠償。

3. 取消旅程或提早結束旅程
如因某啲情況下需要取消或提早結束旅程，同學仔可以索償已經繳付但拎唔返嘅旅遊開支。

4. 個人責任
同學仔可能會對呢個Term陌生，個人責任係指法律上假設個人應有嘅責任，但係因為疏忽而導致第三者傷亡或財物受損所需負上之法律責任。簡單啲講，即係意外，整親人地或人地嘅私人物件啦。如果真係唔小心遇到呢啲意外，而對方亦要求你作出賠償，同學仔記著唔好私底下俾呀！因為係索償時保險公司會要求正式單據，所以最好向當地司法機構及本國大使館求助。

5. 行李及個人物品遺失及損毀
小編以前往法國讀書時有一個好慘痛嘅經歷：香港飛往巴黎搭左１３個鐘長途機，落機時已經係凌晨。當時已經好眼訓又天寒地凍好想可以早啲返酒店休息。點知拎行李時發現行李箱得返三隻轆（呢啲就係傳說中嘅甩轆？）。結果好狼狽咁抽著２７公斤行李排除萬難先去到酒店。當時小編直接向航空公司索償。有部份保險公司條款寫明投保人需要先向航空公司索償，之後再向保險公司索償。如果真係係外地唔見個人物品，記得要係當地警署報失！因為保險公司係處理索償時係需要有法律效力嘅證明文件。

 

購買旅遊保險前亦需留意以下事項：

自負額（Deductible）

自負額較少係旅遊保險出現。意思即係需要投保人自己承擔嘅損失，而超過左呢部份嘅損失會由保險公司承擔。

最高賠償額（Maximum）

保險公司只會承擔某個數額之責任，如果損失扣除自負額已經超過最高賠償額，則需由投保人自行承擔。

不保事項（Exclusions）

投保前要先睇清楚保險條款，究竟咩項目係呢份保險唔包呢？

 

經Agent購買

因為保險條款屬於法律文件，裡面有好多艱深嘅法律字眼常人未必明白。如果你有相熟經紀，由佢解釋入面嘅內容，到真係需要索償時又可以即刻問佢，咁就可以節省大部份嘅工作。

 

網上平台購買

其實如果上方便，可以使用一啲網上平台去比較返各間公司嘅旅遊保險Plan，例如去MoneyHero。只要輸入旅行日期、地方、基本個人資料，就會列返唔同公司嘅Product同價錢，即刻睇到有啲咩Promotion同埋有啲咩item會保，咁就可以選擇最啱自己嘅Plan啦！

 

小編一直認為，保險係一件比較特別嘅產品，佢並唔係「買入一啲令你滿足嘅物品」，而係「買走一啲你不確定嘅因素」。如果幾十蚊可以買個安心，令你旅遊更無後顧之憂，點解唔試下呢？