【又係你吖？Old Seafood】 By C ︱ uFinance 大專學生資訊貸款平台

【又係你吖？Old Seafood】 By C

samantha | 09/10/2019

做個文人•投稿賺錢

話說我為了去日本遊學團，於是平時都宅在家中的我就決定找份兼職，賺團費。

我花了一天時間上網找了許多份工作，分析了天時地利人和之後，決定關上電腦，走到家樓下的麥記應聘，原本去的時候仲擔心人地唔請我，點知個個同我interview嘅姨姨見到我之後，非常熱情，填完form就話我可以番工。

番左一段時間之後，我只係想講一句:呢個世界old seafood真係好X多。

Old seafood 1號，係一個有啲年紀嘅姨姨。佢每日換完制服之後，就企係個飲品機隔離唔做嘢，淨吹水。係啊，你無睇錯，係淨吹水。我都唔知我係咪得罪過佢，佢成日都話我犯錯架喎。有次我裝緊可樂，1號無啦啦過黎話我，「我咪講左咖啡機裡面嘅咖啡粉只可以沖一次！依家呢批咖啡要倒哂去啦！」我心諗，關我叉事？我全程都只係掂過收銀機同飲品機，你部咖啡機，莫講話沖咖啡，我就連咖啡粉都無見過。後來我終於知道，原來係1號佢心血來潮諗住認真工作，跑去沖咖啡，點知佢無check過包咖啡粉係咪已經用過，所以先發生咁嘅事。

Old Seafood 2號係一個年紀大我幾年嘅男生。麥記嘅早餐時段係好忙碌。個男生負責出餐(即係擺食物上餐盤或者外賣紙袋裡)，咁我又係負責沖野飲，要一次過沖好多杯。係處理緊訂單嘅時候，個男仔好唔耐煩咁話「沖野飲個個可唔可以快啲？我都出唔到餐。」Fine~又係我錯吖嘛。我即刻就加快進度，出動埋影分身之術加殘影手，終於我好快處理曬我嘅訂單。我轉身一望，心諗佢應該都出得七七八八，結果，我X 先出得個兩三個餐，說好的我阻礙你進度，搞到你出唔到餐呢？

辭職之後我只想同麥記講聲，永別！