校園Guide

Sem議員！終於可以開啟瘋狂煲劇mode，但係唔知睇咩好？

今期小編推介：懸疑片！懸疑片！懸疑片！一齊進入燒腦世界啦

1）Girl from Nowhere（禁忌女孩）

人人都話校園係社會嘅縮影，呢套泰劇就諷刺哋以校園問題作為故事嘅開端,由惡魔的女兒Nano撕開學校入面「黑暗嘅真相」。由於呢套劇嘅故事係由好多真實案件改編而成，所以喺2018年上映之後就引起咗熱話且引發好多共鳴。而最近第二季亦都已經登陸Netflix,暗黑校園入面仲收埋幾多肉眼睇唔到嘅恐怖故事？大家一齊發掘下啦！

2）Behind Her Eyes (三人要守密，兩人得死去)

呢套英劇被譽為2021年黑馬神劇，雖然係一部得6集嘅迷你影集，但播出唔夠一個月就佔據世界20國熱門排行榜。劇情講述一段意外的婚外情引發一連串弔詭的事跡，節奏超級緊湊，而且亦都打破曬觀眾對道德嘅認知，且結局個大反轉更加係「估你唔到」。鍾意懸疑劇嘅朋友仔千祈唔可以錯過。

3）誰是被害者

呢套台劇講述咗一個患有的亞斯伯格症嘅鑑識人員同社會記者一同追查連續遺願命案嘅故事，當中包含左好多例如霸凌、疾病、自殺等等嘅敏感議題，令人進入劇情後心情就好沈重。而當中嘅場景全部都好真實，佢嘅超擬真命案屍體場景更加令人好似身臨其境咁。偷偷哋話俾大家聽，小編見到「溶屍案」嗰個scene嗰陣真係嚇一嚇。

4) You (安眠書店）

呢套充滿住危險氣息同埋詭譎氛圍嘅美劇第三季已經殺青準備上映，劇集改編自Caroline Kepnes的同名小說，用男主角Joe的角度出發，講述佢恐怖卻唯美嘅愛情故事，劇集節奏非常之緊湊，幾乎每一集都高潮迭起，堪稱係「最浪漫嘅懸疑片」。快啲同小編一齊探索下呢個恐怖情人嘅魅力所在啦！

5）Sweet Home （甜蜜家園）

呢套Netflix原創韓劇改編自人氣同名漫畫，故事描述人類因「慾望」轉變成各種唔同屬性嘅怪物，藉此探討埋藏喺人性深處嘅各種慾望。而且呢套劇嘅特效好細膩精緻，完美咁還原怪物嘅形象。呢套劇嘅劇情融入咗家暴、虐童、性侵等嘅議題，帶出左相比起怪物，人類黑暗面更加恐怖，非常引人深思。