• 校園Guide

文章由 uFinance 提供

有一種人，喺愛情路上不斷遇到仆街，一個接一個，屢戰屢敗，屢敗屢戰，瘋狂吸引仆街埋身，就好似一舊強力磁石咁。身邊總有一個朋友係「仆街磁石」，你又係咪呢種人？擁有咩性格特質容易吸引到仆街？又可以點樣脫離苦海？

 

你係咪一個「仆街磁石」？

首先黎個自我檢查先，睇吓你有無以下「仆街磁石」嘅遭遇、行為、想法。

 

1〜拍拖期間，另一半出軌。

2〜將「談戀愛 / 有人錫」放較高嘅優先次序，甚至首位。

3〜大多數拍拖，認識不夠一個月就同對方一齊。

4〜每次拍拖都相信對方就係真命天子／女。

5〜拍拖期間，另一半約炮。

6〜拍拖期間，另一半經常失蹤唔見人。

7〜拍拖期間，總覺得唔了解另一半。

8〜拍拖期間，另一半有固定sp。

9〜缺乏安全感。

10〜另一半經常性食軟飯，例如食飯唔比錢／經常問你借錢。

11〜害怕單身。

12〜拍拖期間，另一半有玩tinder等交友app。

13〜拍拖期間，面對另一半有誠信錯誤，容易心軟和原諒。

0〜2 呢篇文未必關你事，但都可以繼續睇

3〜5 偶爾遇上仆街，微弱磁力

6或以上 強大磁力

 

無錯，「仆街」周圍都係，但大家又有無諗過自身嘅性格、行為同睇法，都影響自己永遠只會吸引到仆街？（唔係blame the victim啊！！！）

 

「仆街磁石」性格特質／特徵：

1／不自愛

要人愛，首先要自愛，你連自己都唔愛自己，點奢望有人愛惜你？當對方一次又一次出現誠信問題，你仍然原諒對方，同對方一齊，咁犯賤，尤如飛蛾撲火咁傻豬，對方仲點會珍惜你、重視你？

2／唔識分好人壞人

有種講法就係唔識睇人，戀愛經驗較少，或者好容易信人，容易比對方偽裝出黎嘅行為呃到。

3／好需要被愛

好需要愛，好想有愛包圍佢。不論年齡、愛情經驗多或少，佢地對戀愛有種美好嘅憧憬，渴望充滿愛同浪漫，每次談戀愛都一定要轟轟烈烈，每次拍拖都會覺得呢個就係真命天子／女。甚至，一日單身就會生無可戀，導致佢地會不斷拍拖，呢次fail，下次再黎，點知鑊鑊甘。

4／缺乏安全感

呢點係好多人都有嘅特質。唔夠安全感，於是就好心急想搵一個依靠，有時候甚至未了解對方係咩人就決定同對方一齊，於是就受更重嘅傷，更加無安全感，無限loop。

如果我真係一個「仆街磁石」，我可以點？

降低「拍拖」嘅優先次序，學識自愛

呢個做法少少似斬腳趾避沙蟲，專注於其他方面上：讀書、朋友、屋企人、培養自己嘅興趣、學習獨立，保持清醒，無人錫你，你就學識錫自己。識得愛自己，就學識點樣唔被人傷害。

帶眼識人，從錯誤中學習

係重中之重嘅做法！做個賽後檢討，諗吓之前拍拖有過咩問題，搵吓有無啲「仆街」共通點。

一開始認識到一個有好感嘅對象，花多少少時間觀察、同對方相處，問吓朋友意見。