校園Guide

向下碌可以睇下一篇

為咗有一排整齊嘅牙仔，唔少朋友仔都會選擇上箍，畢竟捱幾年就可以脫胎換骨！但其實箍牙嘅心酸你又知幾多啊唉，今日小編就為大家整理咗6個捱過箍牙期嘅小貼士，希望可以幫到想箍／將要箍牙嘅你哋啦！

 

1.飲食習慣要改變

上箍代表大家要暫時與一下呢啲美食say byebye:任何較硬，易染色或者係帶酸性嘅嘢通通都NG!雪條又好，咖哩又好通通都同你無緣。而啱啱上箍嘅初期都淨係食得落麥皮，粥呢啲比較軟嘅食物，向好嘅方面諗：「唯有當減肥」…

2.剝牙痛苦你要受

一般喺箍牙之前，牙醫會為你評估一下牙齒不整齊嘅原因，而一般都係因為牙齒無足夠位置排列先需要箍牙，所以大家最好做足心理準備，好好咁同嗰幾隻牙道別啦（我都知好痛）～

3.口腔清潔要留意

牙套本身唔會損害牙齒，但系留喺牙套上面嘅食物殘渣容易引起蛀牙、牙齦發炎等病癥。所以對於「鋼牙成員」，食完野同埋臨訓前都一定要刷牙，牙刷牙膏就咁就成為咗繼銀包鎖匙電話之後第四樣「出街必備」。

4.期望越大失望越大

好多人認為箍牙後一定有瘦面效果，而且可以一勞永逸。但其實呢個係因人而異嘅，拆牙箍後如果唔按牙醫指示每晚戴「固定器」睡覺，牙齒都係會有移位嘅風險！同埋箍牙主要目的係改善牙齒排列及咬合，並唔保證會瘦臉TT。

5.與不適感做搏鬥

不論你係揀舊式牙箍定係新式嘅透明牙套，牙肉都係會感到痺痛同埋酸軟，無一例外。大家要做嘅嘢就係慢慢哋習慣呢種感覺，而戴舊式牙箍嘅，最初仲會因為牙箍會令口腔出現潰瘍，成口飛滋，Real慘！

6.隱形牙套要自律

隱形牙套可以隨時除低食嘢雖然比起傳統牙箍方便好多，但同時亦都好容易會因為唔記得帶翻而影響效果…為咗保證效果，每日佩戴嘅時間唔能夠少於22個小時。（小編就有個朋友仔就因為成日唔記得帶翻牙套而比牙醫鬧）

 

希望大家都可以與自己嘅牙套和平共處，以靚牙示人～