校園Guide

住Hall住到就嚟癲?住Hall嘅3個壞處

大家都話住 hall係大學生活一部分,但如果體驗到嘅係以下呢啲 住hall壞處 ,咁都係唔好搞我。

生活習慣相異

每個人生活習慣都唔同,要搵到夾得嚟嘅 roommate同中六合彩一樣難。唔係你遷就佢,就佢遷就你,但你確定你真係接受到所有嘢?當你想 1點瞓,唔好意思,你 roommate要通頂溫書, floormate慣咗2點先回魂 active。然後夏天30幾度,你想開開冷氣, sorry,你 roommate要慳錢又怕凍。唔止,你 roommate仲污糟到啲襪一個月都唔洗,係房食薯片食到周圍都係又唔執,廚房廁所成日都有跡有手尾要跟。轉個頭 roommate帶埋佢男/女朋友上嚟,你一條毒 L走又唔係,唔走又唔係。同屋企人住都有啲位頂唔順大家,更何況係同陌生人?

唔同方式 一樣的 chur

住 hall預咗要 chur要融入 hall culture,你唔係以為半夜可以瞓覺嘛?唔使樓跑跳操開樓會搞社團嘢?每個 hall都有唔同事務同一大堆活動,你以為可以自己安排 schedule,自己控制花幾多時間係 hall到,咁就 too young too simple。有啲乜乜比賽,明明唔關你事都迫住要睇;乜乜運動,唔夠人就自動預埋你,其實唔會有自由意志,你唔參加活動就等收 wtsapp轟炸同晦氣千字文。係 hall面前, GPA算什麼?人得 24小時,燃燒 GPA就一定嘅,你以為自己係傳說中高大威猛,玩 6支team都 GPA 4.0嘅神人咩。夜晚隨時要落 common area一齊睇電視,要隨傳隨到,冇私人時間又唔自由。 Reg hall嗰刻就要有心理準備將會被迫做好多你唔想做嘅嘢啦,一 chur再 chur直到你 quit hall。

畀人排嘅危機

當你厭倦呢種生活,唔蒲頭唔畀力成日潛;或者唔認同 hall culture,例如「Hall活動比 GPA重要」,「晚晚通宵證明你冇潛 hall」等等;更甚你同大粒嘢有詏撬,佢睇你唔順眼,你就係咁先,準備好畀人標籤畀人排啦。團結齊心係日復日洗腦嘅成果,係假民主。日日住埋一齊,日日成個 hall都 loop住/信晒同一個價值觀,異見人士會被嘲笑同指責為唔合群﹑會畀人寸﹑被公審。於是就算有人有意見,都唔敢畀人知,日日過得膽戰心驚又虛偽無比,驚一唔小心得罪 hallmate,就連呢篇文都唔敢 like,怕佢哋見到。

但話時話,撞到好 floormate﹑ roommate 分分鐘做到一世好兄弟好姊妹,晚晚一齊玩一齊出街一齊傾心事,日見夜見仲熟過你同中學啲同學。佢哋見過你無化妝無剃鬚蓬頭垢面嘅樣﹑係你趕 paper 時救濟你,為你帶嚟食物﹑嗌你起身返朝早堂……住過hall必定有意外收穫,無論係提早認識到社會嘅運作模式,學習獨立生活,定識到一班肯陪你半夜食宵夜嘅朋友,呢啲回憶都好特別。

  ufinance-cover-pic
每貸款金額$10,000,平均每月利息為$84 (最高申請金額$100,000)
只需身份證學生證即可完成批核!

提早還款絕無罰息或手續費

Advertisements