Ocamp不為人知嘅暗黑事實

林十六 | 07/01/2018
Ocamp不為人知嘅暗黑事實 cover-pic
Ocamp去唔去 ? 玩 ocamp 係「大學五件事」其中一件,大部分大學生都參加過。「幫助新生融入環境」呢啲說辭你就聽得多,但當中一啲唔見得光嘅黑暗面你又知幾多?

搞手嘅考量

搞 ocamp 唔通真係為「幫助新生融入環境」咩?其實係為咗自己 high 同搵下莊,唔想自己支莊後繼無人。因此 r 人玩 ocamp 時,見到啱心水嘅 freshman 會死 r 爛 r ,等佢入到 camp 又 intentionally 同佢玩到熟,時機合適就 chur 佢上莊。
咁報咗係咪就有得玩?當然唔係,報名人數經常超額。但你唔係信佢哋抽籤呀,梗係 Your face your fate,好似 HR 揀 candidate 咁。最佳人選係男/女神, outgoing 玩得開,識搞氣氛;再唔係普通人樣,中規中距,肯講下嘢; cam 友﹑毒 L ﹑過於摺/乖寶寶則可免則免,除非真係唔夠人。有時睇相佬上身,擺 freshman 當日係 booth 影嘅相上 projector 逐個逐個睇,「佢似去蒲開,睇落冇咩責任感,應該會潛莊」﹑「佢眼神唔善良,似會狂食女,不了不了」。唔止 freshman ,揀組爸媽奶 house cap 都係一門深奧學問。情侶一齊 in 只能揀一個,唔係散咗會左口左面破壞 house 氣氛。爸媽間講求互補,最好一個 active 一個體貼,又要諗同成個 house 嘅其他爸媽夾唔夾到。話題終結者﹑唔聽指示嘅自大友等等又係講 bye bye ,最多擺佢做 OC (搬搬抬抬﹑鬼屋扮鬼嗰啲工作人員,唔會同 freshman 有好多接觸)/入後備。所以如果你無入選就知咩事啦。

人事關係複雜

成個 camp 會營造一個大家庭嘅氣氛,好溫馨好有愛,但人多自然是非多,暗地裏啲暗湧多到要搵拆彈專家,關係不如表面和諧。例如 house 同 house 之間會有爭人情況, house cap 當然想自己 house 個個靚仔靚女,性格好好,但邊有咁多筍盤。呢件事亦會進一步加深 house cap 同 center(即負責 plan ﹑搞活動嘅莊員)嘅矛盾,因為 center 係最終決定擺咩 freshman 入 house 嘅裁判。係物資分配﹑各 house 活動嘅先後次序上, house cap 為咗佢自己 house 嘅利益會同 center 有爭執,甚至 house 唔服 center 嘅決定,唔受 center 控制而自由行動,帶晒啲組仔女去 plan 以外嘅地方,又叫組仔女唔好上莊等。 House cap 同組爸媽﹑組爸媽同組仔女等等又係另一啲複雜故事。

脆弱嘅友誼

雖然成個活動講到個個一見如故,關係親到似真爸媽/兄弟姊妹,但更似係為熟而熟,夾硬迫人識半個月左右就講到生死之交又打晒千字文,最後「寫龜背」環節(每人背後有張紙俾其他人寫對佢嘅感想)簡直係用盡畢生嘅虛偽去寫:「雖然你有啲靜,我哋唔係傾過好多計,但得閒都可以一齊出去玩~」當然有機會同某啲人越嚟越 friend ,但人好善忘,又需要時間去維繫友誼,同大部分人只會係 Hi-bye friend ,見咗當識咗, reu 越約越少人,一年後啲 group 沉晒底,最多私 chat 嘅啫。亦唔係去個 camp 就可以突然變 outgoing ﹑識多好多 friend ,更多時只係你嘅 ff。唔去 camp 唔代表你會 0 朋友 0 groupmate 或輸蝕玩過 ocamp 嘅人好多。
最後2個小提醒:活動尺度好睇你去咩 ocamp,有啲出名玩到癲,有啲就好似蒸餾水咁純,最好上網睇完 comment 先俾錢,唔係個個接受到拜真墳撞鬼﹑咸濕 game +歌,到時去到木口木面唔俾反應盞大家唔開心。另外有部份 onight/ocamp 會好易同上堂/學校活動撞期,搞手遊說 freshman 走堂/活動時一定話堂同活動冇用,至於係咪真嘅就自己諗啦。
不過點都好, ocamp 都係珍貴嘅體驗,當中嘅友情可能滲有水份,但一定有真情流露嘅時候,並唔假得晒。大家好努力地嘗試令你感受到溫情同關懷,付出無數時間﹑心血同金錢,啲 plan 改廿幾次涯 n 個通宵只為俾你一個最好體驗。你話做搞手有冇着數攞? sorry 其實好多時係 claim 唔晒錢要自己貼﹑零私人時間﹑俾屋企人 x 日日唔返屋企。係多唔見得光嘅嘢,但其實都係想大家開開心心,起碼熟到 1 ﹑2 個以後都會約出街嘅朋友。光明面同黑暗面並存,無論係一齊練舞定半夜坐埋傾心事,當中大家對你嘅關懷係真嘅,你亦肯定有笑到收唔到聲嘅時候。

延伸閱讀:

【大學生活迷思二】住Hall生活

【大學生活迷思一】讀大學的意義

解釋上莊全術語 — Con Day咩意思?

最不堪回首!召喚聚生DSE回憶

【大學生活迷思三】上莊教曉我的事

    大專生很多時候急需資金周轉交學費,但政府學資處的貸款計劃又未能及時批核。因此,uFinance 根據過往同學們的良好還款紀錄,不斷簡化申請程序,申請只需「學生證+身份證」,申請成功率高達95%,全程網上快捷辦妥,貼合同學需要。

  • 滿足不同經濟需要:交學費、交Hall Fee、還卡數、買電腦、學車、創業
  • 任何本地大專院校學生均可申請
  • 申請只需2份文件(學生證+身份證),毋需收入證明
  • 月平息一律低至 0.84%*
  • 最快即日批核
  • 全程網上申請貸款及確認過數
  • 隨時提早還款,0手續費0罰息

Load more